Sana’y `di na lang
Kung sana’y hindi na lang naging tayo
Hindi sana ako nakakaramdam ng ganito
Kung sana’y hindi na lang sumubok
Hindi sana tahimik na lumuluha sa sulok
Maayos naman noong tayo’y simpleng magkaibigan
Alam ko kung saan ang ating hangganan
Pero bigla’y naisipan mo akong ligawan
At sinabi sa aki’y mayroon kang nararamdaman
Napakasaya ko dahil ako’y nagustuhan mo
Sa isip ko’y napakaswerte ko sa iyo
Kasi alam kong mabuti kang tao
Hindi ko pagsisisihang ibigay ang aking puso
Totoong kaibigan ang turing ko sa iyo noong simula
At noong nagtapat ka’y hindi ako makapaniwala
Pero naisip kong tapat ang iyong hangarin
Na hindi lang laro ang tingin mo sa akin
Pero sa huli ay doon lang din pala ang punta
Nahulog lang din tayo sa mapait na alaala
Ikaw ang dahilan ng gabi-gabing pag-iyak
Ang puso ko, ikaw din pala ang nagwasak
Nahulog kasi ako at minahal ka ng totoo
Umasa ng wagas ang tanga kong puso
Inakalang ang masasaya nating sandali
Ay tanda ng tayo na hanggang sa huli
Hindi ko alam kung kaya ko ang gusto mo
Na manatili na lang na magkaibigan tayo
Dahil hindi ko ala kung kakayanin ko ba
Ang ngitian ka kung muli tayong magkita
Mahirap nang ibalik ang nakaraan
Lalo pa’t may nabigo at nasaktan
Kung pwede lang hilingin sa mga bituin
Hihilingin kong sana `di ka na lang naging akin…
Posted on May 22, 2015, in Poems and verses and tagged breakup, Filipino, Heartbreak, Love, Poem, Poetry. Bookmark the permalink. Leave a comment.
Leave a comment
Comments 0